Joh 2 | WSK | STEP | Udagi tom ilagala namaram mu te, Galilee ningi Cana wonong mu te, kari bo imet ilak numi kuting iluwokko tom biya kaparam. Se Jesus ko nuam tom biya mu ko namaram bagaram.

John 2

Jesus balam se yu waen ko geragam

1 Udagi tom ilagala namaram mu te, Galilee ningi Cana wonong mu te, kari bo imet ilak numi kuting iluwokko tom biya kaparam. Se Jesus ko nuam tom biya mu ko namaram bagaram. 2 Se Jesus ko olekem arungu tom mu ko taimonko den ago nungarman se nama gilingiman.

3 Udagi waen suen la no sapaman se Jesus ko nuam nu maonam, “Waen menaram pa!” mam.

4 Se Jesus nuam maonam, “Imet, mel sumu ko me aninga isaruko. Aninga tom aitak.” ^{▼▼John 2:4 Jesus ko tom me terong makaso: John 7:6,30; 8:20.}

5 Buta se noko nuam mu ura kari alo nunga maonam, “Mel nu beteralko baluk mu kuring la kaoral am beteralko,” mam.

6 Se kawam mu te yu kuting bibiya 6 manga te nungurman mu ago aniram. Mu awuk, Juda nunga munan bo nusuwik nuguting anuwa ko mu karogo. Yu kuting mu suwan suwan yu ningi langikasan mu 20-30 gallon iwita aratoso. ^{▼▼John 2:6 Mu 75-115 litres iwitata.}

7 Se Jesus ura kari nunga maonam, “Yu utual ale yu kuting sowore ningi langiral se kuring aratukko.” Se nuna yu utuman yu kuting te langiman se kuring aratam. 8 Se nu nunga maonam, “Bagunang tal saki te utual ale na bitaruwara kari wore tual se no arigokko,” mam. Se nuna nu balam butata beteman.

9 Se na bitaruwara kari mu yu mu tam no arigam, mu yu maingkala waen ko geragam. Bare nu apareyate waen giman ago taiman mu nu me ko ikiam. Bare ura kari alo yu mu utuman mu nuna waen ko duap ikiman. Se nu kari imet iru taso mu auram se tairam 10 se maonam, “Kari suen biya girisan waen ningo mu langisan kariimet nungarsan. Se ninguru nasan se nungarkasan mu asele waen ko na amining ikup nuam mu langi nungarsan se nasan. Bare ni waen ningo imi ilukuawurem aitakta diram ago tai nangarem!”

11 Jesus giram kilek sokel ago imi Galilee sor te Cana wonong te beteram. Nu ko sokel wetang te beteram. Se ko olekem noko nongomang ningi nunguning aram.

12 Udagi nu ko nuam uria mitak ago ko olekem arungak Capernaum namaman, ale tom sikina mu nuna mu te bagaman.

Jesus temple ningi namaram

(Mat 21:l2-13; Mark 11:15-17; Luke 19:45-46)

13 Juda nunga Passover tom biya pingi aram. Se Jesus Jerusalem namaram. 14 Ale temple kar ningi kasu naguram ale kari meltutuk dia gurugu se animan, sipsip, bulmakau, inanganang biton mu dia se koma manga to se animan, mu nungarkam. Se manga guruga ko kari mu ago dagi se manga gurugu nungaruwakasan mu nungarkam. 15 Ale mayang saki giam ale whip ko moram nungam ale namaram kari mu suen la, nunga sipsip bulmakau karogo nunga kaoram parasuwuram se arataman. Se namaram ale barim, manga te gurugukasan nunumi tuiwaman mu manga ago gurugumu waram se kapaman. 16 Se kari inanganang dia se animan mu nunga maonam, “Gial ago aratalko!” mam. “Imi aninga Ba ko kawam. Nina imi diara kuwim ko me gurugalko.”

17 Se ko olekem alo Jesus mel beteram mu aringiman ale batoga bo Kaem den te mu nungamin te tairam. Batoga mu iwita balam, “Ba, ani angamang ninguru tama ko kaniram, nika temple kako nunguningkiri anirukko.” ^{▼▼John 2:17 Psalm 69:9.}

18 Se Juda nunga kari bibiya mel mu aringiman ale taiman Jesus isarman, “Awiri balam se ni kilek sumu beterem? Buta mu ni kilek biya bo bitar se ana te ikinakko!”

19 Se Jesus nunga maonam, “Nina temple imi parasuwural, mu ani tom ilagala suwan te aking kalikkowo.”

20 Se nuna balman, “Temple imi kaloman mu ko yar 46 aram se kalo kutuwuman! Se ni tom ilagala suwan te kaloko masam e?”

21 Bare Jesus temple ko balukaso mu kota ko kumik guang ko balukaso. 22 Se udagi te, tom nu kueram ale tom ilagala suwan mu te barasam umutang te, ko olekem den nu balam mu nungamin te ares mam se ko ikiman, ale nuna Kaem ko batoga, se Jesus kota ko den balam mu ko ago nongomang ningi nunguning aram.

Jesus kariimet nongomang iki saparam

23 Passover tom te Jesus Jerusalem baga se kilek kilek sokel ago bitakaso, se kariimet arikasan ale suen biya noko nongomang ningi nunguning akaso. 24 Bare Jesus nuna nogo ko me gomang ningi nunguning aram. Mu awuk, nu kariimet suen la nunga ikia mu iki saparam. Nu kariimet nunga munan, nunga ikia bagara ko kari bo me isuam. Mu nu kota nononga nongomang maingkala ikiam. ^{▼▼John 2:25 Jesus kariimet nunga nongomang iki saparam: 1 Kings 8:39; Jer 17:10; John 6:61,64; 13:11.}

25